Göyçayda silsilə oğurluqlar edən dəstə üzvləri saxlanıldı

15.01.2022 | 15:16 Oxunma sayı: 52
Göyçayda silsilə oğurluqlar edən dəstə üzvləri saxlanıldı

Göyçay Rayon Polis Şöbəsinin əməkdaşlarının həyata keçirdikləri əməliyyat nəticəsində rayon ərazisində silsilə oğurluqlar edən dəstə üzvləri saxlanılıb.

DİN-in Mətbuat Xidmətindən “Kriminalqafqaz”a verilən məlumata görə, İkinci Ərəbcəbirli kəndində və şəhər ərazisində yerləşən həyətyanı sahələrdən, eləcə də Qızılağac kəndindəki qaynaqçı sexindən ümumi dəyəri iki min manata yaxın olan dəmir konstruksiyaların oğurlanması barədə polis şöbəsinə müraciətlər daxil olub.

Cinayət hadisələrini törətməkdə şübhəli bilinən qonşular-keçmiş məhkum Orxan Abdurəhimli, Seyran İsmayılov, Tərlan Həsənov və onların oğurladıqlarını daşımaq üçün sifariş etdikləri yük avtomobilinin sürücüsü Qəzənfər Fərzəliyev saxlanılıb. Saxlanılan şəxslər ifadələrində əməllərini etiraf ediblər və gecə saatlarında oğurladıqları dəmir konstruksiyaları Q.Fərzəliyevin idarə etdiyi “Qazel” markalı yük avtomobili ilə daşıyaraq əlvan metal qəbulu məntəqələrinə satdıqlarını bildiriblər.

Faktla bağlı Göyçay Rayon Polis Şöbəsində araşdırmalar davam etdirilir. 

Qeyd edək ki, saxlanılan Orxan Abdurəhimli, Seyran İsmayılov və Tərlan Həsənovun digər analoji cinayətlərdə də iştirakları istisna edilmir. Onların əməllərindən zərərçəkən başqa şəxslər olarsa, bu barədə DİN –in “102” Zəng Mərkəzinə və ya polis şöbəsinə müraciət edə bilərlər.

 

 


Digər xəbərlər